Yangi asr avlodi

“Yangi asr avlodi” nashriyot matbaa markazi 1999 yilda tashkil etildi. Nashriyot turli yosh va turli qatlam oʼquvchilarga moʼljallangan adabiyotlarni yillik nashr rejasi asosida chop etadi. Nashr rejasi bir qancha yoʼnalishlarni oʼz ichiga oladi va bu yoʼnalishlar oʼz maqsad-vazifasi va koʼp sonli oʼquvchilari auditoriyasiga ega, “Zakovat durdonalari” “Yangi asr adabiyoti”, “Muvaffaqiyat kaliti” kabi ruknlarda chop etilgan 800 nomdan ortiq kitoblar oʼquvchilarning talabiga koʼra qayta-qayta nashr etib kelinmoqda

Nashriyot faoliyati faqat kitob nashri bilan cheklanmasligini alohida taʼkidlashni istardik. Respublikamizda nashriyotlarning mahsulotlarini ulgurji xarid qilish imkoniga ega boʼlgan yirik savdo tashkilotlari rivojlantirish bugungi eng dolzarb vazifa hisoblanadi. Mazkur boʼshlikni toʼldirish, respublikamizda kitob savdo tizimini tashkil etish maqsadida nashriyot tassarufida “Book.uz” kitob savdosi tashkiloti barpo etildi. Bugungi kunda mazkur tashkilotning Toshkent shahri, Namangan, Fargʼona, Qashqadaryo, Navoi va Buxoro viloyatlarida filiallari va kitob savdo doʼkonlari faoliyat yuritmoqda. Mazkur kitob savdo tizimi mamlakatimiz nashriyotlari tomonidan nashr etilayotgan adabiyotlarini respublikamizdagi mavjud barcha kitob savdo doʼkonlariga yetkazish faoliyatini olib bormoqda. Shu bilan birga nashriyot qoshidagi bosmaxona faoliyatini modernizatsiya qilish, kitob mahsulotlari hajmi va sifatini oshirish uchun yangi uskunalar oʼrnatish ishlari bosqichma-bosqich amalga oshirilmoqda. Xususan, soʼnggi yillarda Yaponiyada ishlab chiqarilgan yumshoq muqovali kitoblar ishlab chiqarishga moʼljallangan “Gorizont” uskunasi, Xitoyda ishlab chiqarilgan qalin muqovalar tayyorlaydigan uskunalar majmuasi, kitoblarga zarhal bosish uskunasi, lak bilan ishlov berish uskunasi, Germaniyada ishlab chiqarilgan kitoblarni uch tomonlama kesadigan “Perfekta” uskunalari oʼrnatildi.